Registrering og forundersøking
Vi skal sjå nærmare på den delen
av arkeologen sitt arbeid som heng saman med utbygging
av til dømes vegar, bruer, kraftlinjer, bygningar
osb.
Det første arkeologen gjer når dei får melding om at
nokon planlegg å byggje vegar, hus eller liknande, er
å vurdere om det er rimeleg å forvente at ein
kan gjere funn i området. Dersom det er det, startar
dei arbeidet med ei registrering av det området
som vert råka av utbygginga. Registrering i arkeologisk
samanheng vil seie å granske om det finnst spor frå forhistorisk tid eller mellomalder der dei skal byggje.
Frå registrering i samband med bygginga av "Trekantsambandet"
i Sunnhordland", og solding av jordmasser under
registrering på Spissøy, Bømlo kommune.
Det gjer dei ved å leite i overflata eller å grave
seg ned i bakken med spade på leit etter funn. Av og
til trengst det gravemaskin for å fjerne stein eller
tjukke lag med torv som har lege seg oppå dei gamle
bustadene. All jorda (utanom torva) arkeologen grev
opp, vaskar dei i vatn gjennom ei rist. Det kallast
eit "sold". Då renn jorda bort, og nede i soldet ligg
steinane att. Då er det lettare å finne gjenstandane
frå gamal tid.
På ei slik registrering kan dei kanskje finne
enden på eit hus, del av ein eldstad, spor etter kol,
nokre flintbitar eller liknande. Dette er altsama teiken
på at her kan ein vere på sporet etter ei
busetting av noko slag. Då er det lurt å utvide granskinga
litt før ein planlegg ei stor utgraving. Arkeologen
opnar då eit litt større område og
grev litt meir for å verte sikre på kva det er dei har
funne. Ei slik utvida gransking vert kalla ei forundersøking.
|
