Skipshelleren ved Straume

-om utstyr og reiskap

Menneska som budde i Skipshelleren, må etter alt å døma ha laga få reiskapar av flint og andre steinslag. Horn og bein har klart vore deira viktigaste reiskapsmateriale.

18 harpun- og lysterspissar, om lag 120 store og små fiskekrokar og fire garnnåler dominerer funnmaterialet og vitnar om at fangst og fiske må ha spela ei vesentleg rolle. Nokre pilespissar av flint, kvarts og skifer saman med nokre beinpiler fortel likevel om ei viss jakt på landdyr og kanskje fuglar. Prenane, steinaldermenneska sin syl, er vitnemål om at skinn vart gjennomhola og knytte saman til klede og vel og til skinnbåtar.

Reiskapar av metall har derimot vore nær ukjende. Berre i det aller øvste laget vart det funne ein einsleg pilespiss av jern og nokre klinknaglar. Tre har rimeleg sikkert og vore nytta til reiskapsmateriale, men då det har rotna bort, har vi ikkje vitnemål lenger.