Skipshelleren ved Straume

Helleren før utgravingane

Før utgravingane tok til, var heile den nordaustlege delen av hellergolvet dekka av eit jord-, sand- og steinlag som viste seg å innehalda all slags avfall etter menneska som ein gong budde her.

Dei hadde altså kasta det meste av etterlatenskapane sine rett ned på golvet der dei arbeidde, åt og sov. Denne aktiviteten resulterte etter kvart i at det danna seg ein avfallsdunge inne i helleren, og golvflata menneska oppheldt seg på, tok gradvis til å stiga. På denne måten vart avfallet etter dei første brukarane liggjande att nede i dungen, medan avfallet etter dei nye generasjonane etter kvart vart liggjande over.