Bardane er trekanta plater som er bygde opp av keratin, det same byggematerialet som i negler. Desse platene står tett saman i munnen og vert brukte til å sila ut byttedyr frå sjøvatnet. Dei ulike artane har mellom 200 og 400 bardar som heng ned frå kvar av dei to halvdelene i overkjeven.

Av dei 83 kvalartane som finst i verda har berre 11 bardar. Hjå grønlandskvalen kan bardane verta opp til 4 meter lange, men hjå dei fleste andre artane er dei kortare.

I naturlig tilstand er bardane nesten mjuke, og er festa i eit elastisk ”tannkjøt”. På innsida er dei oppfløste i ein hår- eller busteliknande struktur. Då bardane står svært tett, gjev desse busta ei teppeliknande overflate som gjer bardekvalane i stand til å filtrera sjøvatnet.

Finnkvalar fanger mat ved å sluka store mengder vatn med byttedyr.

Med hjelp av eit særleg utforma kjeveoppheng er dei i stand til å opna munnen, slik at underkjeven står nesten vinkelrett på overkjeven. Vatnet vert pressa inn under tunga, slik at denne vert omdanna til ein sekkeliknande struktur som vert pressa ned i struperegionen og dannar buksekken (cavum ventrale).

Når munnen vert attleten, vert effekten av vasstrykket borte. Alt det utstrekte vevet i struperegionen går så attende, og vatn og byttedyr vert pressa opp i munnen der det vert filtrert ut gjennom bardane. Når alt vatnet er ute, har tunga fått attende forma. Ho vert då brukt til å reinska bardane for byttedyr, slik at dei kan svelgjast.

Rettkvalane brukar ein annan teknikk. Dei manglar bardar framme i munnen, slik at det her er ein opning. Når dei sym gjennom næringsrikt vatn med open munn, vert vatnet pressa inn framme i munnen og ut gjennom munnvikene der det vert filtrert i bardane. Etter kvart som  filterflata vert dekka til med byttedyr, vert dei reinska bort med tunga og svelgde.